Совет на општина Гостивар: Доделени 100 илјади евра за здруженија, спортски клубови и НП „Шар Планина“

Гостивар, 30 април 2025 – На последната 45 седница советот на општина Гостивар донесе неколку одлуки со кои финансиски ќе се поддржат здруженија и спортски клубови. Советниците изгласаа одлуки за доделување на финансиски средства на КК Гостивар и ФК Арсими во износ од по 1,2 милиони денари. Од општинската каса ќе се издвојат по 600 илјади денари за РК „Јехона“-Гостивар и шаховскиот клуб „Гостивар“. Ски клубот „Сноу спорт“ ќе добие 150 илјади денари. На финансиска поддршка од општината може да сметаат и здружението „Стресат Гроуп Гостивар“ (900 илјади), друштвото Јуликс Future Open Air Гостивар (600 илјади), а организаторите на театарскиот фестивал „Отело“ 600 илјади денари.

Дискусија се разви околу точката: ПРЕДЛОГ ЗАКЛУЧОК за доделување на финансиски средства 600 илјади денари на национален парк „Шар Планина“ Тетово. Меѓу другото во образложението беше кажано дека овој издаток е во согласност законите за локална самоуправа и животна средина, со што локалната власт има надлежност во областа на заштита на животната средина и да остварува соработка со субјекти кои управуваат со заштитени подрачја. Ема Нешковска (СДСМ) посочи дека НП „Шар Планина“ е јавна установа основана од Владата и дека се јавува, како што рече правна нелогичност.

– Ставката 463 е наменета исклучиво за финансиска поддршка на НВО и не смее да се користи за финансирање на јавни установи. Во случајов, трансферот не само што е планиран од несоодветна ставка, туку е и правно спорен. За да постои правен основ за доделување средства, мора да има договор за соработка, меморандум или друг формален акт меѓу општината и јавната установа, каде што ќе биде прецизирана намената на средствата, и средствата да бидат исплатени од соодветна буџетска ставка. Ако нема договор, правен акт или правилно буџетирање – доделувањето е незаконско, рече Нешковска во дискусијата.

Забелешката на советничката од редовите на СДСМ беше прифатена и претставникот на локалната самоуправа посочи дека станува збор за техничка грешка. По дискусијата точката помина на дневен ред со забелешка дека ќе се смени буџетската ставка.