Гостивар, 4 декември 2021 (МИА) Гостиварскиот градоначалник и генерален секретар на политичката партија Алијанса за албанците, Арбен Таравари нема намера да му се извини на премиерот Зоран Заев по изјавата во која кажа дека нудел пари на пратеничка за да ја придобие при формирање на парламентарно мнозинство.
Таравари потврди дека ја зборувал вистината и дека обајцата знаат што се случило, напомена во одговорот на новинарско прашање, денес во Гостивар.
– Тој знае дека и јас знам. Ако ги решил другите проблеми и покрупни прашања, слободно нека ме тужи, тука сум. Меѓутоа ќе дојде времето кога за оваа работа ќе се прозбори јавно. Бидејќи сме во хибриден режим и не сакам да вовлекувам нашите пратеници во непријатна ситуација, оваа приказна и таа тема ќе ја завршам тука. Јасно е што е направено, изјави Арбен Таравари, генерален секретар на Алијанса за Албанците.
Таравари неодамна во телевизиско интервју обвини низ земјава се „шетало со куфери полни пари“ и дека пратеничка од редовите на Алијанса за албанците добила понуда од пријатели на премиерот да премине од опозиција во владејачкото мнозинство. По ова следеше демант од премиерот Заев и најава за тужба доколку Таравари не се извини за кажаното.
Гостиварскиот градоначалник на десет денови пред состанокот на Европскиот совет искажа песимизам за добивањето на датум за преговори со ЕУ.
– Го чекаме 14 декември, бидејќи имаше ветувања за евроинтеграции. Јас и Алијанса посакуваме датум, но според сигналите што ги добиваме од Бугарија, тоа е невозможна мисија и не верувам дека тоа ќе се случи. Времето е кратко, а позитивен сигнал може да добиеме по формирањето на новата влада во Бугарија, подвлече Таравари
Коментарите се затворени.