Гостивар, 3 април 2025 – Под мотото „ајде во театар“ драмското студио „Дунек“ и центарот за култура „АСНОМ“ ја отвораат театарска сезона во Гостивар. Премиерата на првата аматерска претстава за оваа година „Бегалка“ (Amor Vincit Omnia) е закажана за утре (петок, 4.04.2025) во 20 часот. Оваа претстава е во продукција на НУЦК АСНОМ и во неа учествува актерската екипа на Драмското Студио – Дунек – Гостивар. Влезницата е 150 денари, а приходот од продажбата ќе биде наменет за помош на семејствата кои беа погодени од трагедијата во Кочани.
Непосредно пред премиерата Radio G разговараше со учесниците во овој театарски проект и пренесува дел од атмосферата и мотивите за поставувањето на „Бегалка“ чиј автор е Васил Иљоски. Станува збор е еден од најпознатите и најпоставувано дело на македонската битова драма. Директорката на центарот за култура АСНОМ, Фарије Адили посочува дека претставата е за сите возрасни групи.
– Самиот автор објаснува дека делото го напишал за народот и за широките народни слоеви. Претставувајќи ја борбата против надживеаните и штетни традиции, обичаи и општествени стеги во времето на социјални судири. Ова е првата аматерска, театарска претстава за оваа сезона во наша продукција, рече Адили.
Режисерот, Ѓорѓи Нешкоски за новиот предизвик го објаснува мотивот за поставување на овој текст и смета дека тој лежи во поривот за социјална правда, за победата на човечноста наспроти сите општествени девијации со кои сме опкружени.
– Некои теми за кои мислиме дека сме ги надминале во нашата општествена и социјална еволуција, ни се провлекуваат покрај нас, но во последно време кое е многу страшно и сурово, за жал, ги препознаваме како општоприфатен стандард, вели Нешкоски.
Оваа драма зборува за победата на доброто наспроти злото, за човечноста наспроти алчноста, прикажувајќи ги вечните дилеми коишто може еден човек да ги има-љубовта, чесноста, храброста, силата, верноста и богатството. Сепак таа ќе го следи новото време и театарска игра.
– Нашата Бегалка е поставена во модернистички стил. Може да се забележи по насловот којшто и го дадовме „Amor vincit omnia“ што преведено од латински значи: Љубовта секогаш победува, појаснува асистентот на режија Александар Нешкоски.
Декорот и костимографијата се осмислени во неконвенционален стил и за нив е задолжена Теодора Волческа.
– Со етноелементи и детали се задржува архаичната автентичност, за да потсетува на времето во кое е напишана, но и како огледало на тоа дека некои појави, за жал сè уште не се променети, кажа Волческа.
Во претставата актерската магија ја доловуваат и членовите на Драмското Студио – ДУНЕК.
Иако се глумци аматери и сите на помлада возраст, тие се вложуваат максимално и најавуваат едночасовно уживање. Овие 13 таленти ги пренесуваат нивните искуства додека работеа на претставата.
– Се пронајдов во ликот на Донка, како сведок на една драматична судбина во претставата. Се надевам дека ликот го доловив во најдобро светло, кажа Михаела Неделковска која го игра ликот на Донка.
– Уживав во создавањето на ликот на Трендо. Многу научив од тој лик, посебно за мудроста кој како карактер ги обединува позитивните и негативните ликови – кажа актерот Давид Ќипровски.
– Ми беше многу тешко да создадам лик кој е себична и материјалистички настроена жена. Но исто така, беше тешка и макотрпна задача, кажа Емилија Серафимоска која го толкува ликот на Јасна, жената на газда Стојан.
– Кралица без круна, која очекува сиот свет да ѝ се поклони, тоа е Мирса. Мислам дека имаме одлична претстава и ги поканувам сите да нѝ дојдат на нашата претстава, изјави актерската Кристина Мицоска.
– Евра беше одраз на сите жени што некогаш ги сретнав – силни во тишината и гласни во своите чекори. Таа ме научи дека сцената и животот се само различни завеси на истата приказна. Кога ја играв, не ја глумев – ја оживував. На сцената, таа зборуваше низ мене, а јас молчев низ неа. Некои рекоа дека ја оживеав, но вистината е дека таа ме оживеа мене, кажа актерката Анастасија Антеска
– Голем предизвик е да го играш ликот на Аџи-Трајко. Патријархалниот маж кој верува во машката доминација. Неспособен да се приспособи на промените останува заробен во неговите уверувања. Неговата крута природа го симболизира угнетувачкиот патријархат. – кажа актерот Александар Билбилоски.
– Ја толкувам улогата на Ева, ќерката на Мирса. Лик кој ужива во луксузот, и кој главна цел има да се омажи за богат маж, појаснува актерката Надица Дрецкоска.
– Бошко го доживувам како ехо на време кога љубовта е борба, а судбината испишана. Го играм пренесувајќи се во време кога љубовта се искажувала со чукање под прозор и испраќање писма кон саканиот, каде срцето шепоти, а обичаите викаат. Тој е тивок, но упорен борец. Во негова борба и упорност ја наоѓам магијата на ликот. Од Бошко дека човекот е богат и без злато, ако срцето му е полно со љубов и верба во подобро утре, вели актерот Филип Билбилоски.
– Велика е симбол и пример на времето од патријархалните норми и традиции. Болката која ја носи во себе тивко, како товар кој никогаш не престанува, е исцрпувачки и многу тешко но уживав во создавањето на ликот и мислам дека многу ми помогна во изградба на мојот актерски потенцијал, кажа актерката Емилија Филипоска.
Актерките Матеа Милошеска и Михаела Ивковиќ ни изјавија дека како дел од ова, за нив второ, актерско искуство, уживале создавајќи ги ликовите на модните дизајнерки Кирјана и Аника (мајка и ќерка). Тие се заробени поради лихва кај газда Трајко. Нивната игра ја отсликува борбата на мајката да го направи невозможното, за своето дете да го насочи кон прав пат.
– Го толкувам ликот на Досе, вљубеното момче во невозвратената љубов на Ленче. Син на локалните богаташи Стојан и Јасна, кои му овозможуваат сè што ќе посака – изјави актерот Горазд Јовчески.
– Го толкувам ликот на Ленче и сум многу среќна што имам прилика да го играм. Ленче ме научи да се борам за љубовта, за вистинскиот момент но и за вистинските човечки вредности, наспроти овој суров свет и наметнатите општествени норми кои не секогаш го вадат најдоброто од нас, рече актерката Јелена Јовановска.
Влезницата е 150 денари, почетокот е закажан за 20 часот.
Коментарите се затворени.