Во Гостивар расте опфатот со редовни вакцини

Гостивар, 22 април 2026 – Здравствените работници оценуваат дека опфатот со вакцинација во гостиварско има пораст и интересот на родителите за вакцинирање на децата е зголемен. Во Здравствен дом и службата за службата за вакцинација, се води евиденција за опфатот со вакцинација и податоците кои ги споделија по повод „Европската недела на имунизација“ со ДПТ процентот е 92% додека со МРП вакцина опфатот изнесува 89%. Тоа, споредно со претходните години е показател дека има зголемување.

Лекарот во службата за вакцинација д-р Дафина Богданоска посочи дека една деценија се одбележува Европска недела на имунизација која годинава е опфатена со кампањата „Заштитуваме генерации“ и дека со неа се промовира редовното вакцинирање.

– Можам да се пофалам дека бројката на вакцинирани деца оваа година е зголемен, но наталитетот во општина Гостивар е многу намален. Во 2024 година имавме 466 раѓања, во 2025 – 367. Годинава веќе се запишани 78 деца. Ние како служба сме достапни и стоиме на располагање за сите нејаснотии, типот на вакцината, за начинот на давање, за видовите на вакцините и на тој начин да им овозможиме на родителите да ја донесат одлуката , вели д-р Богданоска.

Таа потсети дека токму заради вакцинирањето се обезбедува подобро здравје на идните генерации и дека на тој начин се искорените заразни болести големата кашлица, детската парализа, туберкулоза, тетанус, сипаници, дифтерија. Во рамки на „Европската недела на имунизација“ посебно организирани тимови со покани по телефон и пишани покани ќе ги потсетат родителите да ги донесат децата за да не се доцни со редовната имунизација.

Главната сестра, Линдита Гаши смета дека подигањето на свеста на родителите е многу важна, без оглед каде децата се родени.

– Родителите на новороденчињата кои се родени надвор од нашиот град, низ породилиштата во Скопје и други клиники, треба да дојдат во нашиот оддел за вакцинација и да почнеме со отворање на вакциналниот картон и да продолжи нивниот редовен календар, вели Гаши.