Гостивар, 19 август 2021 Мерките за санација на Русино, предвидени во првата фаза според првиот човек на екологија се при крај и тие ќе завршат до крајот на овој месец. По завршувањето на градежните работи се очекува и отпочнување со работа на меѓуопштинското комунално претпријатие.
Министерот за животна средина и просторно планирање Насер Нуредини денеска беше во обиколка на нестандардизираната депонија во Русино, каде во тек е реализацијата на брзите мерки за санација на депонијата.
Од МЖСПП информираат дека досега се реализирани сите подготвителни работи, поставена е колската вага за мерење на количини на отпад, во тек е изградба на насипи и воспоставување на системот за управување со протекување на исцедокот.
-Започнато е и асфалтирање на патот до депонијата, a паралелно се работи и на подготовката на документација на алтернативен пат до Русино од патот Гостивар – Маврово. Се очекува брзите мерки да бидат целосно завршени до крајот на август годинава, наведуваат од ресорното министерство.
Според најавите, по ова ќе се започне со втората фаза од проектот и управувањето со Русино ќе биде предадено на заедничкото јавно регионално претпријатие Русино/Полог, формирано од сите општини од Полошкиот плански регион.
Коментарите се затворени.