Гостивар, 12 февруари 2025 – На пригоден собир, во присуство на членови на Сојузот на борци од Гостивар, ученици, граѓани и претставници на политички партии се одбележаа годишнината од загинувањето на народниот херој Злате Малакоски и борбените операции за време НОВ познати како Февруарски поход. На собирот низ обраќања беше потсетено на овие значајни датуми од историјата на Народно ослободителната антифашистичка војна и за важноста од почитувањето на слободарската традиција на македонскиот народ.
– Зачувувањето на споменот за Злате не е само цивилизациска потреба, тоа пред сè потреба на сегашните и идни генерации да се поттикнуваат да ги сочуваат неговите вредности и врз нив да создаваат нови, уште посилни. Само така, жртвата и борбата на Злате ќе има своја смисла и оправдување, рече Радислав Ѓиноски, претседател на Здружението на борци и граѓани продолжувачи на традициите на НОАВМ – Гостивар.
Професорката по историја Катица Аврамоска во обраќањето потсети на дел од историските моменти за Февруарскиот поход, акција која партизанската војска ја спровела во сурови услови. Оваа акција која траела еден месец и била тактички маневар со кој се создале услови да извојуваат победа против окупаторите.
– Револуционерната традиција создадена низ вековниот отпор, остави длабоки траги во макотрпната историја на македонскиот народ. Таква е трагата на датумот на Февруарскиот поход, кој е длабоко втемелен во историското паметење на нашиот народ. Февруарскиот поход останал наш факел на непресушните извори на револуцијата, рече Аврамоска.
Учесниците на собирот и делегации оддадоа почит со едноминутно молчење и положување на цвеќе на споменикот на паднатите борци од НОВ во градскиот парк.
Коментарите се затворени.